Илон Маск НАТОни «тўлиқ қайта ташкил этишга» чақирди
0
Ҳукумат самарадорлиги департаменти (DOGE) раҳбари, миллиардер Илон Маск НАТОни тўлиқ қайта ташкил этишга чақирди.
«НАТО тўлиқ қайта ташкил этилишга муҳтож», — деб ёзади у Х ижтимоий тармоғидаги саҳифасида.
Маск олдин ҳам НАТОга нисбатан кескин баёнотлар билдирган. Хусусан, ўтган йилнинг мартида у инвестор Дэвид Сакснинг НАТОнинг даври тугагани ва у тугатилиши кераклиги ҳақидаги фикрини қўллаб-қувватлаган эди. «Тўғри. НАТОнинг душмани ва унинг мавжудлиги сабабчиси Варшава пакти тарқатиб юборилганига қарамай, у фаолиятини давом эттираётганига доим ҳайрон қоламан», — деб ёзганди ўшанда Маск.
Ушбу баёнот кўпчилик танқидига учраган эди. Жумладан, Латвия президенти Эдгарс Ринкевичс унга қуйидагича жавоб қайтарган: «Қадрли Илон Маск НАТОнинг ташкил этилишига асос бўлган сабаб мавжуд ва мавжуд бўлади ҳам — бу Россия ва эркин дунёнинг бошқа душманларидир».
Аввалроқ Илон Маск «Озодлик радиоси» ва «Америка овози» медиа-корпорацияларини «радикал сўл телбалар» деб атаб, уларни солиқ тўловчиларнинг пулларини беҳуда сарфлашда айблаганди.
Эслатиб ўтамиз, 2024 йил ноябрида Доналд Трамп тадбиркор Илон Маскни DOGE раҳбари этиб тайинлаган эди. DOGE «ҳар йили 6,5 миллиард долларлик давлат харажатларида мавжуд бўлган катта исрофгарчилик ва фирибгарликни йўқ қилади», деган эди ўшанда Трамп. Унинг сўзларига кўра, департамент Оқ уйнинг бюджет идораси билан ҳамкорлик қилади ва «маслаҳат ва кўрсатмалар беради».