АҚШ Марк Фогел эвазига россиялик Александр Винникни озод қилади
0
Америка расмийлари томонидан пул ювишда айбланиб, ҳибсга олинган россиялик Александр Винник АҚШ ва Россия ўртасидаги маҳбуслар алмашинуви доирасида озод этилади. Бу ҳақда ABC News Доналд Трамп маъмурияти вакилига таяниб хабар берди.
Куни кеча гиёҳванд моддалар контрабандаси учун Россияда 14 йилга қамалган собиқ дипломат Марк Фогел АҚШга қайтарилган эди. Винник айнан қачон ватанига жўнатилиши ҳозирча номаълум.
Доналд Трамп Марк Фогел билан
РФ президентининг матбуот котиби Дмитрий Песков 12 феврал куни бўлиб ўтган брифингда Москва ва Вашингтон маҳбуслар алмашинувини ўтказаётганини тасдиқлаган.
Александр Винник 2017 йилда АҚШ сўрови билан Грецияда ҳибсга олинган. Америка ҳукумати Винникни BTC-e криптовалюта биржаси орқали салкам 4 миллиард доллар пулни ювишда айблаган. Россия фуқароси 50 йилгача озодликдан маҳрум этилиши айтилган эди. Винникнинг экстрадициясини, шунингдек, Франция ва Россия ҳам талаб қилган.
2020 йил январда ўзининг Россияга топширилишини сўраган Винник Францияга экстрадиция қилинганди. Мазкур мамлакатда у зарарли дастурий таъминотни яратганлик иши бўйича айбдор деб топилган ва беш йил муддатга озодликдан маҳрум этилган. 2022 йил августда Винник Грецияга қайтарилган, сўнг АҚШга экстрадиция қилинган. 2024 йил майда Винник Америка прокуратураси билан келишувга эришгани ва ўз айбига иқрор бўлгани маълум қилинганди.