Мексикада “Европанинг кокаин қироли” отиб ўлдирилди
0
Мексикада “Европанинг кокаин қироли” Марко Эббен отиб ўлдирилди. Эббенга суиқасд жорий йилнинг 13 февраль куни амалга оширилган, деб ёзади Дарё.
Нидерландиялик наркотик моддалар савдогари дунёдаги энг кўп қидирилаётган жиноятчилардан бири эди. Тергов маълумотларига кўра, у кўп йиллар давомида Мексиканинг Синалоа картели билан ҳамкорлик қилиб келган. Дунёдаги энг шафқатсиз жиноий ташкилотлардан бири бўлган мазкур картел минглаб қотилликлар учун жавобгардир.
2017 йилда Синалоа картели раҳбари Хоакин “Эл Чапо” Гусман ҳибсга олинганидан сўнг, картел ичида ҳокимият учун кураш бошланган. Эббен Гусманнинг рақиби Исмоил “Эл Майо” Замбада томонига ўтган, деган тахминлар мавжуд. Ўшандан бери у ҳар қандай вақтда ҳужумдан хавотирда яшашга мажбур бўлган.
Бироқ кокаин қиролининг ўлдирилиши ортида унинг тахминий дўстлари турган бўлиши мумкин: улар Мексиканинг наркотикларга қарши курашиш бўлими нидерландияликларни қидириб топгани ва уни ҳибсга олмоқчи эканлигидан хабар топишган. Гангстерлар сўроқ пайтида сирларни ошкор қилиши мумкин бўлган шахсни йўқ қилишга қарор қилган, деб ёзади Bild.
Аниқланишича, қотиллар Марко Эббенни Мехико яқинидаги Атисапан-де-Сарагоса шаҳрида жойлашган ҳашаматли спорт зали ёнида пойлаб туришган. У ўзининг зирҳли Кадиллак автомобилидан бир қадам нарида турганида отиб ўлдирилган. Мексика расмийларининг баёнотига кўра, қотиллар ҳарбий полициядан атиги 14 дақиқа олдин ҳаракатга ўтишган.
Полиция Эббеннинг жасадида АҚШ Наркотикларга қарши кураш бошқармасининг (DЕА) сохта гувоҳномасини топган. Унда “кокаин қироли”нинг тахаллуси Хесус Антонио Веласкес Ривас деб ёзилган. Бу Эббен ўз шахсини сохталаштиришининг биринчи ҳолати эмас: у Россияда Европа Иттифоқи дипломати ниқоби остида, Бразилияда эса Европолнинг махсус агенти сифатида саёҳат қилган. Айнан шу ташкилотнинг энг кўп қидирилаётганлар рўйхатига у ананас қутиларида 400 килограмм кокаин контрабандасини амалга оширгани учун киритилган эди.