Шаҳбоз Умаровнинг голи ва ассисти “Турон”га ғалаба келтирди!
Ўзбек легионерлари – “Турон”нинг таянчи
Жамоанинг 24 футболчидан иборат таркибининг ярми хорижликлар бўлиб, улар орасида Ўзбекистон, Беларусь, Черногория ва Россиядан келган ўйинчилар бор. Ўзбек футболчилигининг тўрт вакили – Шаҳбоз Умаров, Одилжон Абдумажидов, Беҳруз Асқаров ва Хуршид Мухторов жамоанинг асосий фигураларидан бирига айланиши кутилмоқда.
Шаҳбоз Умаров ва Одилжон Абдумажидов Қозоғистон чемпионати муҳитини яхши билади, чунки улар бунгача “Ордабаси” сафида тўп суришган. Тажрибали ҳимоячи Хуршид Мухторов ва ёш иқтидорли Беҳруз Асқаров эса илк бор хориж чемпионатида ўз омадини синаб кўрмоқда.
Ғалабали старт ва Шаҳбозбекнинг фантастик ўйини
“Турон” янги мавсумни ўз майдонида “Окжетпес”га қарши ўйин билан бошлади. Учрашувда Шаҳбоз Умаров, Одилжон Абдумажидов ва Хуршид Мухторов асосий таркибда майдонга тушди.
Беллашув қаҳрамони Шаҳбозбек Умаров бўлди. У 32-дақиқада Жумабек Абилайханнинг узатмасини аниқ зарба билан дарвозага йўллаб, ҳисобни очди. Бу гол “Турон”ни руҳлантирди ва иккинчи таймда жамоа янада фаол ҳаракат қилди.
70-дақиқада Россиялик легионер Лука Згуриский иккинчи голни киритди ва унга Шаҳбозбек Умаров ассистентлик қилди. Бу пас “Турон”нинг мавсумни ғалаба билан бошлашига ёрдам берди.
Учрашув якунида ҳисоб ўзгармади – “Турон” 2:0 ҳисобида ғалаба қозониб, муҳим уч очкони қўлга киритди!
Дебют ва майдонда тўлиқ ўйнаган ўзбек футболчилари
Ўзбекистонлик уч футболчи – Шаҳбозбек Умаров, Одилжон Абдумажидов ва Хуршид Мухторов бутун учрашувни майдонда ўтказди ва ўзини яхши томондан кўрсатди. 89-дақиқада эса Беҳруз Асқаров заҳирадан майдонга тушди ва Қозоғистон чемпионатидаги илк ўйинини ўтказди.
Келгуси учрашув – “Актобе”га қарши сафар ўйини
Қозоғистон чемпионатининг иккинчи тури 8-9 март кунлари бўлиб ўтади. Бу сафар “Турон” сафарда “Актобе” меҳмони бўлади ва бу учрашувда ҳам зафар қучишни мақсад қилган.
Легионерларимиз ҳақида қизиқарли фактлар
Одилжон Абдумажидов – “Турон”га “Металлург” (Бекобод) жамоасидан келиб қўшилган 23 ёшли марказий ҳимоячи. У аввал “Олимпик” ва “Динамо Самарқанд” клубларида ҳам тўп сурган.
Хуршидбек Мухторов – 31 ёшли тажрибали ҳимоячи “Турон”га Фарғонанинг “Нефтчи” клубидан эркин агент сифатида келиб қўшилди. Бунгача у Ўзбекистондаги бир қатор клубларда, жумладан, “Қўқон-1912”, “Сўғдиёна”, “Локомотив” ва “Насаф” сафида ўйнаган.
Беҳруз Асқаров – 21 ёшли ҳужумкор футболчи “Пахтакор” тарбияланувчиси бўлиб, у ўйин амалиёти ва тажриба тўплаш учун бир йилга “Турон”га ижарага берилган.
Шаҳбоз Умаров – 2022 йилдан бери Қозоғистон чемпионатида тўп тепиб келаётган қанот ҳужумчиси. У аввал “Ордабаси” клуби сафида чемпионлик ва кубок ғолиблигини қўлга киритган.
Қозоғистон Премьер-лигасининг янги мавсуми қизиқарли бошланди ва “Турон” сафидаги ўзбек легионерлари биринчи ўйиндаёқ муҳим ўрин тутди. Шаҳбозбек Умаровнинг гол ва ассисти жамоани ғалабага етаклади, Абдумажидов ва Мухторов эса ҳимояда ишончли ўйин намойиш этди.
Келгуси турда ҳам ўзбек легионерларидан янги юксак натижалар кутиб қоламиз!