Виталий Левченко: "Дастлабки дақиқаларда жамоамда саросима ва ҳаяжон кузатилди"
0
"Биринчи навбатда барчани чемпионат бошлангани ва 8 март хотин-қизлар куни билан табриклайман. Бевосита ўйинга тўхталадиган бўлсак, биринчи ўйин эди. Шу боис дастлабки дақиқаларда бироз саросима кузатилди. Бу табиий ҳолат. Кейинги дақиқаларда ўйинда мувозанат қила олдик, умуман икки жамоа ҳам ғалаба учун ҳаракат қилди. Ўйлайманки, бугунги ўйин стадионга ташриф буюрган мухлисларга манзур келди. Таблодаги ҳисоб ўйинга мос бўлди.
"Нефтчи" бугун ғалаба қозониши керак эди, лекин "Бунёдкор" таркибида ҳам ўзгаришлар бўлганини, сифатли футболчиларни қўшиб олганини айтишимиз мумкин. Чемпионат энди бошланди. Иккинчи голни урганимиздан сўнг ортга чекиндик, рақибга имконият бериб қўйдик. Улар устунликка эга чиқишди. Футболчи ғалаба қозонаётганида албатта натижа учун ҳаракат қилади, бу руҳият билан боғлиқ.
Ҳисобда олдинда бўлган вазиятимизда ўз ўйинимизни кўрсатишда давом этишимиз керак эди. Назарий машғулотларда буни кўриб чиқамиз ва таҳлил қиламиз. Футболчилар ўйин ритмини ушлаб олиши керак. Расмий ўйин ва норасмий ўйиннинг фарқи катта. Футболчилар бир-бирини тушуниб боряпти, бу ўйиндан-ўйинга яхшиланади", - дейди Виталий Левченко.