Ўқитувчиларни таъмирлаш ишларига мажбурлаган директор 41 миллион жаримага тортилди
Андижон вилоятида жамоатчилик эътиборини тортаётган яна бир ҳодиса қайд этилди. Марҳамат туманида жойлашган 42-мактабда ўқитувчиларни мажбурий равишда таъмирлаш ишларига жалб этган директор лавозимидан озод этилди, у энди нафақат ишсиз, балки катта жаримага ҳам юз тутади.
Меҳнат инспекцияси маълумотларига кўра, ушбу таълим муассасасининг раҳбари З.Мамажонова педагогларни таъмирлаш ишларига мажбуран жалб қилган. Қайси асосда, деб сўрайсизми? Айнан таҳдид орқали — “ишлашни хоҳламасангиз, дарс соатларингиз камайтирилади”, деган.
Инспекция 4 август куни ўрганув ишларини олиб борди ва натижада собиқ директорга 41 миллион 200 минг сўм миқдоридаги жарима тайинланди. Бу жарима Маъмурий жавобгарлик тўғрисидаги кодекснинг 51-моддаси 2-қисмига асосан белгиланган. Мазкур моддага кўра, ўқитувчиларни мажбурий меҳнатга жалб қилганлик учун БҲМнинг 100 бараваригача жарима жазоси кўзда тутилган.
Айни вақтда мактабнинг собиқ директори энди лавозимда эмас. Бошқарма вакилларининг таъкидлашича, ўқитувчилар билан суҳбат чоғида таъмирлаш ишлари “ихтиёрий” бўлганини билдиришган. Аммо раҳбар ўз зиммасидаги масъулиятни бажармагани учун лавозимидан озод этилган.
Ҳодиса ижтимоий тармоқларда ҳам кенг муҳокамаларга сабаб бўлди. 2 августда тасвирга олинган видеолар 3 август куни тарқалиб, жамоатчиликнинг кескин эътирозига сабаб бўлди.
Эндиликда савол туғилади: мактаб раҳбарлари таълимнинг сифатини ошириш билан эмас, девор бўяш, пол ювиш, ойна тозалаш каби ишларга устозларни мажбурлаш билан бандми?
Ҳар қандай ҳолатда ҳам устозлар шаънига доғ туширувчи, уларни меҳнат ҳуқуқларидан маҳрум қилувчи ҳолатларга нисбатан муросасиз ёндашиш — таълим тизимида очиқлик ва адолатни таъминлашда муҳим қадам ҳисобланади.