Миржалол Қосимов "Қўқон-1912"га қарши мағлубиятнинг сабабларини айтди

Суперлига 24-туридан ўрин олган ОКМК - "Қўқон-1912" (0:1) учрашувидан сўнг ОКМК бош мураббийи Миржалол Қосимов матбуот анжуманида иштирок этди ва учрашув ҳақида ўз фикрлари билан ўртоқлашди. Қосимовнинг айтишича, жамоа ғалаба қозонишни жуда хоҳлаган, аммо учрашувнинг бошидаги хато уларга қимматга тушди.

"Ҳар бир футболчи жамоасига ғалаба олиб келмоқчи бўлади, лекин биринчи бўлимдаги хато бизга жуда катта таъсир кўрсатди. Жамоа ҳаракат қилди, аммо гол ура олмадик. "Қўқон-1912"ни ғалаба билан табриклайман. Бугун биз кўп хатоларни амалга оширдик ва уларнинг барчасини таҳлил қилишимиз керак. Ҳозир жамоага кичик таътил берадиган бўлсак, кейин яна машғулотларга қайтамиз. Олдинда катта синовлар бор, жамоамиз жиддий тайёргарлик кўриши керак", — деди Миржалол Қосимов.

Ундан ташқари, "ОКМК"нинг охирги икки турда кутилмаган мағлубиятга учрашига ҳам у ўз фикрини билдирди. "Футболда шундай бўлади, биз ҳамиша энг яхши натижа учун ҳаракат қиламиз. "Андижон" билан ўтган ўйинда, биринчи бўлимда тўп ўтказган бўлсакда, иккинчи таймда барча устунликларимизга қарамай гол ура олмадик. Шунингдек, "Қўқон-1912" билан ҳам шундай бўлди. Майдонимизнинг ҳолати ҳам жуда ачинарли, бу бизга муаммо бўлиб турмбди", — деди у.

Шунингдек, Қосимов Аброр Каримовнинг "Қўқон-1912" сафидаги ўйинига ҳам тўхталди. "Аброр Каримов бизнинг клубга тегишли. Ижарага берилган футболчимизнинг янги имкониятларга эга бўлишга уриниши ва ўйин амалиётини топишга ҳаракат қилишини тушуниш мумкин. Аброр ҳар доим бизнинг жамоамизга керак бўлган футболчи ва келажакда унинг ОКМКга қўшган ҳиссаси катта бўлади", — деб қўшимча қилди бош мураббий.

Қосимов "ОКМК" дарвозабонларидаги кўп хатолар ва бунинг сабаблари ҳақида ҳам гапирди. "Ҳа, бу йил дарвозабонларимиз томонидан катта хатолар ва уларнинг кўплиги кузатилди. Биз уларни алмаштиришга ҳам ҳаракат қилдик. Чемпионатимизда осон ўйинлар бўлмайди, ҳар бир баҳс жуда катта рақобат билан ўтади, бу эса уларнинг руҳиятига таъсир кўрсатмоқда. Шундай бўлса-да, биз фаолиятимизни давом эттирамиз ва хатолардан ўрганишга ҳаракат қиламиз", — деб ўз фикрларини баён этди.

Миржалол Қосимовнинг фикрларига қараганда, жамоа янада кучлироқ бўлиши учун ҳар бир футболчи хатолардан ўрганиб, яхши натижаларга эришиш ва мухлислар учун хурсандчилик олиб келиши керак.