ҲАМАС Трамп таклиф этган келишувга шартли розилик билдирди

Фаластиндаги ҲАМАС ҳаракати Америка президенти Доналд Трамп тақдим этган тинчлик режаси доирасида муҳим баёнот берди. Гуруҳ ўзининг расмий мурожаатида Ғазо секторидаги барча тирик қолган гаровдагилар ва ҳалок бўлганларнинг жасадларини Исроилга топширишга тайёрлигини билдирди. Бу ҳақда AFP агентлиги ҳамда Al Jazeera телеканали хабарига асосан маълум қилинди.

ҲАМАС ўз баёнотида: «Агар зарур шарт-шароит яратилса, биз президент Трамп томонидан таклиф этилган алмашинув формуласи асосида ҳаракат қиламиз. Музокараларни воситачилар орқали зудлик билан бошлашга ҳам тайёрмиз», — дея қайд этди.

Шунингдек, ҳаракат Ғазо сектори бошқарувини келгусида «Фаластин миллий консенсусига асосланган ва араб ҳамда исломий қўлловга эга мустақил органга топшириш» ниятини ҳам билдириб ўтди. Бу эса минтақада янги сиёсий жараёнлар учун йўл очиши мумкин.

Бироқ, ҲАМАС сиёсий бюроси вакили Мусо Абу Марзуқнинг таъкидлашича, гаровдагиларни ва жасадларни 72 соат ичида топшириш амалда деярли имконсиз, бу ҳозирча фақат назарий масала сифатида баҳоланмоқда.

Ҳаракат қуролсизланиш масаласи борасида ҳеч қандай қарор қабул қилмаганини ҳам очиқ билдирди. Қатарда жойлашган ҲАМАС етакчилари АҚШ президенти таклиф этган режадаги айрим шартларни ўзгартириш зарурлигини таъкидламоқда.

АҚШ президенти Доналд Трамп эса Truth Social тармоғида ҲАМАСнинг жавоб матнини эълон қилиб, ушбу жараён тинчлик йўлида сўнгги имконият бўлиши мумкинлигини ёзди. Агар келишув амалга ошмаса, у ҳолда ҲАМАС учун мислсиз оқибатлар бўлишини таъкидлади.

Бу воқеа минтақадаги мураккаб сиёсий жараёнларнинг янги босқичга қадам қўйганидан далолат бермоқда. Келгусидаги музокаралар эса нафақат Ғазо, балки бутун Яқин Шарқ тақдирига катта таъсир кўрсатиши мумкин.