«Майнц» рақибини енгиб, турнир жадвалида охирги поғонани тарк этди

Сўнгги турларда очколар йиғишни бошлаб юборган «Майнц» сешанба куни ўзига бевосита рақиб бўлган «Ҳайденҳайм»ни қабул қилди. 2:1 ҳисобидаги ғалаба эвазига майнцлар мағлубиятсиз сериясини тўртта учрашувга етказиб, ниҳоят турнир жадвалидаги энг паст ўриндан чиқиб кетди. Бу ҳақда euro-football.ru хабар беради.

Учрашувнинг 30-дақиқасида Чхе-Сон Ли жарима майдонида Силван Видмерни топди ва ҳимоячи тўпни ҳаводан чиройли тарзда дарвозага жойлаб қўйди — 1:0. Иккинчи бўлим бошида эса Надим Амири бир тегишда аниқ зарба йўллаб, ҳисобни 2:0 кўринишига келтирди. Орадан кўп ўтмай Амири яна голли пас муаллифига айланиши ҳам мумкин эди: у Арминдо Зибни қулай вазиятга чиқарди, бироқ дарвозабон зарбани зўрға қайтарди.

Ўйиннинг тахминан 60-дақиқаларида интрига қайтди: қарши ҳужумда Ариён Иброҳимович дарвозабонни алдаб ўта олмади, қайтган тўпни эса Штефан Шиммер бемалол тармоққа йўллади — 2:1. Шундан кейин «Майнц» ҳисобни ушлаб қолди ва муҳим уч очкони қўлга киритди.

Натижадан сўнг «Ҳайденҳайм» турнир жадвалида охирги ўринга тушиб қолди. «Майнц» эса қўшимча кўрсаткичлар эвазига рақибини ортда қолдирди, 12 очко тўплаган «Санкт-Паули» эса тўплар нисбатига кўра улардан юқорироқда бормоқда.