ChatGPT Free ва Go режимида энди рекламалар қўйилади

OpenAI ChatGPT’нинг бепул тарифида ва ChatGPT Go режимида реклама кўрсатиш бўйича синовларни йўлга қўйишини маълум қилди. Компания расмий баёнотига кўра, синовлар аввал АҚШда, яқин ҳафталарда бошланади.

Энг муҳим жойи: OpenAI реклама чатбот жавобларига таъсир қилмаслигини айтяпти. Яъни “ким кўпроқ пул тўласа — ўша ҳақ” деган мавзу бўлмайди, реклама жавобдан ажратилган ва аниқ белгиланган кўринишда чиқади. Дастлабки босқичда реклама одатда жавобларнинг пастки қисмида, суҳбат мавзусига мос “спонсорли” таклиф бўлса, кўриниши режалаштирилган.

Реклама кимларда бўлмайди? OpenAI бу масалада ҳам аниқ: Plus, Pro, Business, Enterprise (ва Edu) обуналарида реклама бўлмайди.

Махфийлик бўйича ҳам компания “қалин ваъда” берди: фойдаланувчиларнинг ChatGPT билан ёзишмалари реклама берувчиларга сотилмаслиги, рекламани шахсийлаштиришни эса исталган пайт ўчириб қўйиш мумкинлиги айтилган. Бундан ташқари, фойдаланувчи реклама нега кўрсатилганини кўриши ёки уни бекор қилиб сабабини ёзиши ҳам мумкин бўлади.