Apple 2025 йилда смартфон бозорида қандай қилиб етакчи бўлиб қолди?
Counterpoint Research таҳлилига кўра, 2025 йилда глобал смартфон бозорида Apple етакчиликни яна қўлдан бермади. Йил давомида сотилган ҳар беш смартфоннинг биттаси iPhone бўлиб, компания савдо динамикасида энг барқарор ўйинчи сифатида кўринди. Бу кўрсаткич iPhone’га бўлган талаб пасаймаганини англатади.
Ҳисоботда Apple’нинг бозор улуши 20 фоиз экани қайд этилди. Мутахассислар буни қурилмаларнинг юқори сегментдаги мавқеи, янгиланишларга содиқ фойдаланувчилар ва хизматлар экотизимининг қулайлиги билан изоҳлайди. Шунингдек, операторлар ва расмий савдо каналлари орқали таклиф қилинадиган акциялар ҳам сотувларни қўллаб-қувватлаган.
Иккинчи ўринда Samsung жойлашди: компания 19 фоизлик улуш билан Apple’дан атиги бир поғона орқада қолди. Бу натижа Galaxy қаторининг турли нарх тоифаларини қамраб олиши ва кўплаб бозорларда кучли дистрибютсия тармоғи билан боғланади. Таҳлилчилар яқин фарқ келгуси йилги рақобатни янада кескинлаштиришини, брендлар эса янги моделларда камера, батарея ва сунъий интеллект имкониятларини устувор йўналишга айлантиришини таъкидлади.