«Арсенал» Ҳаверцнинг жисмоний ҳолатидан хавотирда қолмоқда

Лондоннинг «Арсенал» клуби ҳужумчиси Кай Ҳаверц жароҳатдан фориғ бўлганига қарамай, жамоанинг сўнгги икки учрашувида захирада қолди. Бу ҳақда euro-football.ru хабар беради.

Немис футболчи август ойида олган шикастидан кейин қарийб беш ой майдонга туша олмади. Микел Артета уни январдаги кубок баҳсларида — «Портсмут» ва «Челси»га қарши ўйинларда — захирадан майдонга туширганди. Бироқ кейинги тўқнашувларда «Ноттингем Форест» ҳамда Миланнинг «Интер»ига қарши учрашувларни Ҳаверц захира ўриндиғида ўтказди.

Журналист Исон Ханнинг хабар беришича, «Арсенал»да 26 ёшли футболчининг жисмоний тайёргарлиги борасида ҳануз хавотир сақланиб қолган. Ҳаверц сафга қайтгач, яна янги ноқулайликка дуч келгани учун клуб унинг ўйин амалиётини мажбуран чекламоқда.

«Канонирлар» Ҳаверцни асосий таркибга шоширмай, мавсумнинг ҳал қилувчи қисми олдидан оптимал формага олиб келиш ниятида.