Давид Трезеге Буэнос-Айресда «Ривер Плейт» раҳбариятига қайтди
Туриннинг «Ювентус» клуби ва Франция терма жамоаси собиқ ҳужумчиси Давид Трезеге яна Аргентинага йўл олди. У фаолияти давомида «Ривер Плейт» сафида ҳам тўп суриб, ҳатто мамлакат иккинчи лигасида чемпионликни қўлга киритган эди. Бу ҳақда euro-football.ru хабар беради.
Эндиликда Трезеге майдондаги эмас, клуб ичидаги вазифани бажаради — у «Ривер Плейт»нинг бошқарув таркибига қўшилмоқда. Клуб уни раҳбарият иштирокида тақдимот орқали таништирди.
Француз мутахассисининг аниқ лавозими очиқланмади, бироқ у стратегик масалалар билан шуғулланиши ва клубни институционал даражада намоён этиши айтилди.
Эслатиб ўтамиз, Давид Трезеге футболчилик фаолиятини 2015 йилда якунлаган.