Ҳусанов асосийдами? "Сити" ҳал қилувчи кечада "Галатасарой"га қарши...

Европа Чемпионлар лигаси умумий босқичи ҳал қилувчи нуқтага етиб келди: қитъанинг энг бақувват жамоалари сўнгги — 8-тур ўйинларини ўтказади ва шундан кейин мусобақани давом эттирадиган 24 жамоа номи аниқ бўлади.

Шу “калит” кечада Ўзбекистон миллий терма жамоаси аъзоси Абдуқодир Ҳусанов ҳам диққат марказида. У “Манчестер Сити” сафида Туркия чемпиони “Галатасарой”га қарши муҳим тўқнашув олдидан жамоа билан тайёргарликни тўлиқ олиб бормоқда.

City Xtra қандай таркибни тахмин қилди?

“Шаҳарликлар” ҳаётини яқиндан кузатиб борадиган cityxtra.co.uk сайти бўлажак учрашув олдидан “Сити”нинг тахминий асосий таркибини тузиб чиқди. Уларга кўра, жамоа мураккаб вазиятда — жароҳатлар ва айрим футболчиларнинг ҳолати сабаб маълум позицияларда вариант кам, шунинг учун мураббийлар штаби энг ишончли комбинацияга суянади.

Манба тахминига кўра, таркиб қуйидагича бўлиши мумкин:

Дарвозабон

• Жанлуижи Доннарумма — экспертлар уни бу мавсум “Сити”даги энг таъсирли фигуралардан бири дея таърифламоқда.

Ҳимоя

• Матеуш Нуньеш — ўнг қанотда қайтадан ўз ўрнига тушиб, ўйинини сезиларли яхшилагани таъкидланади.

• Абдуқодир Ҳусанов — Натан Аке билан марказда жуфтлик қилиши кутиляпти. Манба бу қарорни жароҳатлар кўплиги ва марказда ишончли вариантлар чеклангани билан изоҳлайди.

• Нико О’Райли — чап томонда барқарорлик ва фойдали ҳаракатлари билан ажралиб турган футболчи сифатида кўрсатилган.

City Xtra’нинг асосий урғуси битта: Ҳусановнинг тезлиги, шиддати ва жисмоний тайёргарлиги Акенинг тажрибаси билан “пазл” бўлиб тушса, ғалаба керак бўлган кечада бу комбинация жуда қўл келиши мумкин.

Ярим ҳимоя

• Тижани Рейндерс ва Бернарду Силва — марказда тўпни назорат қилиш, ўйин темпини бошқариш ва тўғри қарор чиқариш учун.

• Фил Фоден — “ўнлик” позициясида. Манба у сўнгги пайтда энг яхши формасида эмаслигини тан олса-да, катта ўйинларда доим “портлайди” деган ишончни ёзган.

Ҳужум

• Райан Шерки — ўнг қанотда ассистлар билан жамоага кислород бераётган футболчи сифатида қайд этилган.

• Эрлинг Холанд — голлар тўхтаб қолган бўлса ҳам, унинг "класс"и шубҳасиз: рақиб ҳимоясини ўзига “тортиб”, бошқаларга майдон очади.

• Жереми Доку — чап қанотда ҳаракат, тезлик ва дриблинг билан босимни оширади.

Тахминий асосий таркиб (City Xtra):
Доннарумма; Нуньеш, Ҳусанов, Аке, Нико О’Райли; Рейндерс, Бернарду Силва; Фоден; Шерки, Холанд, Доку.

Ўйин қачон бошланади?

“Манчестер Сити” — “Галатасарой” учрашуви 28 январдан 29 январга ўтар кечаси, Тошкент вақти билан 01:00 да старт олади.

Хулоса шундаки: бу кеча “Сити” учун ҳам, Ҳусанов учун ҳам катта имтиҳон. Мухлисга эса шу ёқади — босим бор жойда характер чиқади. Агар марказда Ҳусанов–Аке жуфтлиги ишонч берса, олдинда Холанд учун ҳам “ҳаво очилиши” мумкин.