Жалолиддин Машарипов чет элда операция қилингани маълум бўлди

Эроннинг «Истиқлол» клуби матбуот хизмати маълум қилишича, Жалолиддин Машарипов жароҳатидан кейин даволаниш жараёнини давом эттириш учун чет элга юборилган ва у ерда жарроҳлик амалиётини бошдан кечирган.

Баёнотда футболчининг соғлиғига доир асосий маълумот берилиб, Машариповга тезроқ тузалиш, реабилитацияни муваффақиятли ўташ ва майдонга янада бақувват ҳолда қайтиш тилаги билдирилган.

Маълумот ўрнида, Ўзбекистон миллий жамоаси аъзоси жароҳати сабаб анча муддат майдондан узоқда қолиб кетган, 1 январ куни эса қайта ўйинга қайтган эди. Ўша баҳсда у захирадан майдонга тушган, бироз вақт ўтгач эса яна алмаштирилгани ҳам қайд этилди — демак, муаммо ўзини яна бир бор сездирган.

Ҳозирча Машариповнинг қанча муддатга сафдан чиққани расман айтилгани йўқ. Лекин битта нарса аниқ: асосийси шошмасдан, тўлиқ тикланиб қайтиш. Ярим тайёр ҳолатда қайтиш — “камбек” эмас, ортга қадам бўлиб қолади.