Саудиялик журналист Роналдуни устун қўймасликларини таъкидлади
Криштиану Роналду клуб бошқарувидан норози эканини билдириб, «Ал-Наср»нинг айрим учрашувларини бойкот қилаётгани ҳақида хабарлар тарқалди. Вазиятга муносабат билдирган саудиялик телебошловчи Валид ал-Фараж юлдуз футболчининг мақоми қоидалардан устун қўйилмаслигини айтди. Бу ҳақда euro-football.ru хабар беради.
Ал-Фаражнинг таъкидлашича, Саудия Арабистонидаги спорт тизими ва лига регламенти «қизил чизиқ» ҳисобланади: жаҳон юлдузи бўлиш тартибни бузишга асос бўла олмайди. У Роналдуни регламентни ҳурмат қилишга ва қонунларга риоя этишга чақириб, «биз Роналду олдида тиз чўкмаймиз, мамлакатимиз ва лигамиз ҳаммасидан устун», деган фикрларни илгари сурди.
Маълумот учун, Криштиану Роналдунинг «Ал-Наср» билан амалдаги шартномаси 2027 йилнинг ўрталаригача мўлжалланган.