«Барселона» Суперлига лойиҳасидан чиқишни расман тасдиқлади

Каталониянинг «Барселона» клуби ўтган ҳафта охирида Суперлига лойиҳасидан чиқишини эълон қилди. Бу қарор юзасидан клуб президенти Жоан Лапорта муносабат билдирди. Бу ҳақда euro-football.ru хабар беради.

Лапортанинг таъкидлашича, Суперлига амалда ҳаётга татбиқ этилиши қийин бўлган ташаббус бўлиб, у кўпроқ харажат талаб қилади, аммо аниқ фойда бермайди. «У ерда бўлиш биз учун ноқулай эди, сабаби “Реал” билан муносабатларимиз ҳам энг яхши даражада эмас», — деди у.

Шунингдек, клуб раҳбари «Барселона» Европа футбол оиласига қайтганини қайд этди ва ҳозир ФИФА ҳамда УЕФА раҳбарияти билан алоқалар ижобий йўлга қўйилганини айтди. Лапортага кўра, клубнинг кейинги мақсади — Европа футболини ривожлантириш.

«Барселона»нинг чиқишидан сўнг, Суперлига лойиҳасида ягона қолган клуб Мадриднинг «Реал»и бўлиб турибди.