«Интер» Димарко билан шартномани 2030 йилгача узайтиришга яқин

Миланнинг «Интер» клуби ҳимоячиси Федерико Димарко билан янги келишув бўйича музокараларда якуний босқичга яқинлашди. Инсайдер Николо Скира маълумотига кўра, томонлар 2030 йилгача мўлжалланган шартнома имзолашга яқин турибди. Бу ҳақда euro-football.ru хабар беради.

Хабарларга кўра, АПЛнинг бир нечта жамоаси футболчига қизиқиш билдирган, бироқ гап аниқ таклифларгача етиб бормаган. Ҳозирча ҳам клуб, ҳам Димарко ҳамкорликни давом эттиришни устувор деб билмоқда.

28 ёшли чап қанот ҳимоячиси «Интер» академияси тарбияланувчиси ҳисобланади. У «Сьон», «Парма», «Верона» ва «Асколи»даги ижаралардан сўнг Милан жамоасига қайтиб, вақт ўтиши билан «нерадзурри»нинг асосий футболчиларидан бирига айланди.

Жорий мавсумда Димарко 31 ўйинда майдонга тушиб, 6 та гол урди ва 13 та голли узатма амалга оширди. Унинг амалдаги шартномаси 2027 йилгача кучда, Transfermarkt эса футболчини 50 миллион еврога баҳоламоқда.