Наумов Моуриньога Саудия чемпионати мослигини айтди
“Локомотив”нинг собиқ президенти Николай Наумов “Бенфика” бош мураббийи Жозе Моуриньога қайси лига кўпроқ мос келишини айтди. У бу борадаги фикрларини “Евро-Футбол.Ru” нашрига берган интервьюсида билдирди. Бу ҳақда euro-football.ru хабар беради.
Наумовнинг фикрича, Моуриньонинг энг юқори даражадаги даври ортда қолган ва унга танаффус керак. Эксперт португалиялик мутахассис футбол тенденцияларидан бироз ортда қолганини, авваллари сирли ва кутилмаган қарорлари билан ажралиб турган мураббий энди эса оддийроқ кўринишга кириб қолганини таъкидлади.
Наумов Моуриньога Саудия Арабистони чемпионатини энг қулай вариант сифатида кўрсатди. Унинг айтишича, у ерда маошлар юқори, можароларни хуш кўришади ва тажрибали, ёши катта юлдуз футболчилар билан ишлаш имконияти ҳам бор.
Моуриньонинг “Бенфика”си Чемпионлар лигаси 1/16 финалида Мадриднинг “Реал”ига қарши майдонга тушади. Илк учрашув 17-февраль куни Португалияда бўлиб ўтади.