«Манчестер Юнайтед» Рюерсонни ўнг қанот ҳимояси учун кузатмоқда
Ўнг қанот ҳимоясида Диогу Далот ва Нуссайр Мазрауи вариантларига эга бўлса-да, «Манчестер Юнайтед» бу позицияни кучайтириш устида ишламоқда. TEAMtalk хабарига кўра, клуб трансфер бозорида янги номзодларни фаол ўрганмоқда. Бу ҳақда euro-football.ru хабар беради.
Манбага кўра, Далот жорий мавсум АПЛда 21 ўйинда стартда майдонга тушганига қарамай, унинг «Олд Траффорд»даги узоқ муддатли келажаги ҳануз аниқ эмас. Бунга бир томондан Мадриднинг «Реал» клуби ҳимоячига қизиқиш билдираётгани, бошқа томондан эса янги шартнома Диогу маошининг сезиларли оширилишини талаб қилиши сабаб бўлмоқда.
«МЮ» скаутлари эса сўнгги учрашувларда Дортмунднинг «Боруссия»си сафида порлаган Юлиан Рюерсоннинг ўйинидан ижобий таассурот олди. Норвегиялик футболчи фақат ўнг қанот ҳимоячиси эмас — у бутун қанотни ёпиши, зарурат бўлса вингер сифатида ҳам ҳаракат қилиши мумкин. 28 ёшли терма жамоа аъзоси клуб билан 2028 йилгача шартнома имзолаган ва унинг трансфери 40 миллион евродан арзон бўлмаслиги айтиламоқда. Рюерсон бу мавсум барча мусобақаларда 29 ўйинда 13 та голли узатма муаллифи бўлди.