Почеттино Месси, Неймар ва Мбаппени бошқариш осон эмас деди

ПСЖнинг собиқ бош мураббийи Маурисио Почеттино Париждаги даврида юлдуз футболчилар билан ишлаш қанчалик мураккаб эканини эслади. У аргентиналик мутахассис қўл остида ҳужум чизиғида Лионел Месси, Неймар ва Килиан Мбаппе учлиги бирга тўп сурган эди. Бу ҳақда euro-football.ru хабар беради.

Почеттинонинг айтишича, бундай даражадаги футболчилар билан ишлаганда уларнинг таъсири баъзан клуб миқёсида ҳам каттароқ бўлиб кетади. Мураббий Мессидан доимий прессинг кутиш нотўғри эканини таъкидлади: унинг фикрича, Месси ҳеч қачон прессингга таянган услубда ўйнамаган, ҳатто Гвардиола давридаги энг зўр йилларида ҳам.

Мутахассис шунингдек, натижа бўлмаганда кўпинча масъулият барибир мураббий зиммасига тушишини қўшимча қилди.

Ҳозир Маурисио Почеттино АҚШ терма жамоасини жаҳон чемпионатига тайёрламоқда. ОАВда эса ёзда у яна “Тоттенҳем”га қайтиши мумкинлиги ҳақида миш-мишлар тарқалган.