Компани Кейн учун титул рекорддан устунроқ дейди
Гарри Кейн «Вердер» дарвозасига икки бор гол уриб, Бундеслиганинг жорий мавсумида 26 та голга етди. Англиялик ҳужумчи бир мавсумдаги голлар бўйича Роберт Левандовски ўрнатган рекордни (41 гол) янгилаш имкониятини сақлаб турибди. Бу ҳақда euro-football.ru хабар беради.
Бироқ «Бавария» бош мураббийи Винсент Компани Кейн учун энг муҳим нарса шахсий статистика эмас, жамоанинг натижаси эканини таъкидлади. Мутахассис журналистларга: «Менимча, Кейн учун Бундеслига чемпионлиги рекорддан анча муҳим», деди.
Шундан сўнг Компани кулиб: «Лекин, эҳтимол, адашаётгандирман: мен ҳимоячи бўлганман, у эса ҳужумчи. Кейн доим гол ургани каби, бундан кейин ҳам уришда давом этади», дея қўшиб қўйди.
Ҳозирда «Бавария» Бундеслига жадвалида пешқадам. Иккинчи ўриндаги «Боруссия»дан фарқ олти очкони ташкил этмоқда.