Беллингем фаолиятидаги энг оғриқли омадсизликни айтди

Мадриднинг «Реал» клуби ярим ҳимоячиси Жуд Беллингем фаолиятида ҳануз ёдидан чиқмайдиган энг аччиқ омадсизлик ҳақида гапирди. Бу ҳақда euro-football.ru хабар беради.

Англиялик футболчи Дортмунднинг «Боруссия»сида ўйнаган пайтида Бундеслигадаги чемпионликни сўнгги турда бой бериб қўйганини эслади. «Майнц» устидан ғалаба «асаларилар»ни чемпионга айлантириши мумкин эди, бироқ учрашув 2:2 ҳисобида якунланиб, олтин медаллар яна «Бавария»га насиб этди.

«Мени ҳозиргача таъқиб қиладиган омадсизликми? “Боруссия” билан мавсумнинг охирги кунида қўлдан кетган чемпионлик. Эслатганингиз учун раҳмат», — дея Беллингемнинг сўзларини келтиради Madrid Zone.

Жуд Беллингем 2023 йил ёзида, Германиядаги ўша драматик якундан кўп ўтмай, «Боруссия»дан «Реал»га кўчиб ўтганди.