Беллингем фаолиятидаги энг оғриқли омадсизликни эслади

Мадриднинг “Реал” клуби ярим ҳимоячиси Жуд Беллингем фаолиятида ҳануз ёдидан чиқмайдиган энг аламли лаҳза қайси эканини айтиб берди. Бу ҳақда euro-football.ru хабар беради.

Англиялик футболчи “Боруссия” Дортмунд сафида Бундеслигада сўнгги турда қўлдан бой берилган чемпионликни эслади. “Майнс” устидан ғалаба “асаларилар”ни чемпион қиларди, бироқ учрашув 2:2 ҳисобида якунланди ва олтин медаллар яна “Бавария”га насиб этди.

“Ҳали ҳам мени қувиб юрадиган омадсизликми? Мавсумнинг охирги кунида “Боруссия” билан қўлдан кетган чемпионлик. Эслатганингиз учун раҳмат”, — дея футболчининг сўзларини Madrid Zone келтиради.

Эслатиб ўтамиз, Беллингем 2023 йил ёзида — Германиядаги ўша драматик якундан кўп ўтмай — Дортмунддан “Реал”га кўчиб ўтган эди.