Ўзбекистонда ҳилол кўринмади: Рамазон 19 февралдан расман бошланади

Ўзбекистон мусулмонлари идораси ҳузуридаги Фатво маркази 17 феврал кунги кузатувлар бўйича муҳим маълумот берди: ҳижрий 1447 йил Рамазон ойи ҳилоли Ўзбекистонда кўринмаган.

Диний идора қайд этишича, бу хулоса Ўзбекистон Республикаси Фанлар академияси қошидаги Астрономия институти тақдим этган астрономик маълумотлар билан ҳам тасдиқланган. Яъни, масала “ким нима деди” эмас — ҳисоб-китоб ва кузатув бир нуқтада учрашган.

Қарор қандай бўлди?

Шу асосда 18 феврал — Шаъбон ойининг 30-куни деб белгиланди. Рамазон ойининг биринчи куни эса 19 февралга тўғри келиши ҳақида қарор қабул қилинди. Қисқа қилиб айтганда: бир кун “қўшимча тайм”, кейин Рамазон старт.

Қайси давлатлар ҳам 19 феврални танлади?

Диний идора маълумотига кўра, қатор мусулмон мамлакатлари ҳам Рамазоннинг биринчи куни сифатида 19 феврални эълон қилган. Улар орасида:

• Миср Араб Республикаси

• Иордания

• Сурия

• Ироқ

• Эрон

• Туркия

• Қозоғистон

• Қирғизистон

• Тожикистон

• Туркманистон

• Озарбойжон

• Индонезия

• Бруней

• Уммон

• Сингапур

• Австралия

• Япония

• Покистон

• Ҳиндистон

• Малайзия

• Жанубий Корея

Шунингдек, Европа фатво ва тадқиқотлар кенгаши ҳам 19 феврални Рамазоннинг биринчи куни, деб эълон қилгани айтилди.

Саудияда сана бошқачароқ чиқди

Бугун тушдан кейин Саудия Арабистони Олий суди ҳузуридаги ой кўриш қўмитаси 18 феврални Рамазоннинг биринчи куни сифатида эълон қилгани ҳам қайд этилди. Бундай фарқлар амалда учраб туради: ойни кўриш мезонлари, география ва ҳисоб-китоб услуби турлича бўлиши мумкин.

Ўзбекистонда расмий ёндашув ҳам аниқ

Ўзбекистонда эса 16 феврал куни “Муборак Рамазон ойини муносиб тарзда ўтказиш тўғрисида”ги президент қарори имзоланиб, унда 2026 йилги Рамазон бошланиши 19 февралга тўғри келиши ҳақидаги дин идораси ахбороти маълумот учун қабул қилингани билдирилди.

Хулоса шу: сана расман аниқ, тайёргарликка вақт бор. Энг муҳими, Рамазонни ҳар ким ўз уйида, ўз қалбида ҳам тартиб билан, эзгу ният билан қарши олсин.