Мбаппе Престианинининг Винисиусга айтган ҳақоратини ошкор қилди
Мадриднинг "Реал" клуби ҳужумчиси Килиан Мбаппе Чемпионлар лигасида "Бенфика"га қарши баҳсдан сўнг очиқ фикрлари билан ўртоқлашди. Бу ҳақда euro-football.ru хабар беради.
"Қаймоқранглилар" 1:0 ҳисобида зафар қучди. Учрашувдаги ягона голни 50-дақиқада Винисиус Жуниор киритди. Орадан кўп ўтмай бразилиялик футболчи лиссабонликлар ўйинчиси Жанлука Престианинидан эшитилган ирқчилик мазмунидаги ҳақоратлар бўйича ҳакамга шикоят қилди.
Мбаппенинг айтишича, Престианини Винисиусни бир неча бор "маймун" деб атаган. Француз ҳужумчи бу сўзларни аниқ эшитганини, рақиб футболчи эса оғзини беркитиб, гапини яширишга уриниб кўрганини таъкидлади.
Шунингдек, Мбаппе Престианинининг узр сўраши масаласига ҳам муносабат билдириб, бундай ҳолатни эътиборсиз қолдириб бўлмаслигини айтди. Унинг фикрича, ёш бўлиш ҳақоратли ва камситувчи сўзлар ишлатишга оқлов бўла олмайди. Мбаппе "Бенфика" ва унинг мураббийига нисбатан эътирози йўқлигини, бироқ Престианини энди Чемпионлар лигасида ўйнамаслиги кераклигини қўшимча қилган.
Қайд этилишича, тахмин қилинаётган ҳақоратли эпизод ҳакам томонидан протоколга киритилган ва кейинчалик кўриб чиқилади.