«Байер» Горецкага кўз тикди, ярим ҳимоячи АПЛни хоҳлайди

Мюнхеннинг «Бавария» клуби ярим ҳимоячиси Леон Горецка Леверкузеннинг «Байер» жамоаси эътиборини тортди. «Фармацевтлар» 31 ёшли футболчини марказдаги янги етакчи сифатида кўрмоқда — аввал бу ролни Гранит Жака бажарган. Бу ҳақда euro-football.ru хабар беради.

Манбаларга кўра, леверкузенликлар аллақачон Горецканинг вакиллари билан алоқага чиққан. Футболчи бу вариантни кескин рад этмаган бўлса-да, ўзи учун устувор йўл сифатида Англия Премьер-лигасига кўчиб ўтишни афзал кўрмоқда. Қишда унинг хизматларига Лондоннинг «Тоттенҳэм» ва «Арсенал» клублари ҳам қизиқиш билдирганди.

Эслатиб ўтамиз, жорий мавсум якунида Горецка эркин агентга айланади — амалдаги шартнома узайтирилмайди. У 2018 йилдан бери «Бавария» сафида тўп суриб келмоқда.