Бугун Тошкентда кучли туман: тўрт рейс қўна олмади

Тошкент шаҳрида ноқулай об-ҳаво, хусусан, кучли туман сабаб бир қатор рейслар муқобил аэродромларга йўналтирилди. Бу ҳақда Uzbekistan Airports ахборот хизмати маълум қилди.

Маълум бўлишича, бугун — 18 февраль куни Тошкент халқаро аэропорти ҳудудида кучли туман кузатилган.

Шу сабабли "Centrum Air" авиакомпаниясининг Санкт-Петербург — Тошкент йўналишидаги C6422 рейси экипажи Навоий халқаро аэропортига қўнишга қарор қилган.

Шунингдек, "Turkish Airlines" авиакомпаниясининг Истанбул — Тошкент йўналишидаги THY368 рейси экипажи Самарқанд шаҳридаги муқобил аэродромга юборилган.

Яна бир "Centrum Air" авиакомпаниясининг Жидда — Тошкент йўналишидаги C6322 рейси ҳам Самарқанд халқаро аэропортига қўндирилган.

Бундан ташқари, авиакомпаниянинг Гуанчжоу — Тошкент йўналишидаги C6512 рейси экипажи ҳам ҳаво шароити сабаб Самарқанддаги муқобил аэродромга йўналишни ўзгартирган.

Хабарда таъкидланишича, Тошкент халқаро аэропортидан самолётлар парвози одатий тартибда амалга оширилмоқда, чекловлар фақат рейсларни қабул қилиш жараёнига қўлланилган.