Матиас Алмейда Ла Лигада етти ўйинга четлатилди
"Севилья" бош мураббийи Матиас Алмейда Испания Ла Лигаси интизомий комиссияси қарори билан етти учрашувга дисквалификация қилинди. Бу жазо ўтган ҳафта охирида "Алавес"га қарши баҳсда мураббий четлатилгани ортидан қўлланди. Бу ҳақда euro-football.ru хабар беради.
Учрашувнинг 85-дақиқасида Алмейда аввалроқ огоҳлантиришлар олганига қарамай яна кескин норозилик билдириб, натижада ҳакам томонидан майдондан ҳайдалди.
Комиссия изоҳига кўра, етти ўйинлик четлатиш бир нечта бандлардан иборат: 2 тур — ҳакам қарорларига эътирозлар учун, 1 тур — четлатилгандан кейин майдонни тарк этишни чўзгани учун, 3 тур — ҳурматсиз хатти-ҳаракатлар ва ортиқча ишоралар учун. Яна 1 тур эса Алмейда кетаётганда сув шишасини бир неча бор тепиб юборгани сабаб қўшилди.
Шу тариқа, аргентиналик мутахассис "Реал" ва "Барселона"га қарши муҳим учрашувларни ҳам ўтказиб юборади.