Хулиан Алварес 2026 йил ёзида «Барселона»га ўтади

Мадриднинг «Атлетико» клуби ҳужумчиси Хулиан Алварес 2026 йил ёзида «Барселона» сафига кўчиб ўтиши кутилмоқда. Бу ҳақда euro-football.ru хабар беради.

TyC Sports журналисти Хьюго Балассон хабарига кўра, трансфер 2026 йилги жаҳон чемпионатидан кейин амалга ошиши мумкин. Битим қиймати тахминан 70 млн еврони ташкил этади.

Манбага кўра, футболчига фақат каталонияликлар эмас, бошқа клублар ҳам қизиқиш билдирмоқда. Алвареснинг ўзи ҳам муҳитни ўзгартириб, совринлар учун реал кураша оладиган жамоага ўтишни кўзламоқда.

2025/26 йилги мавсумда Алварес барча клуб турнирларида 35 ўйинда майдонга тушиб, 13 гол урди ва 6 ассист қайд этди.

Ҳужумчининг «Атлетико» билан амалдаги шартномаси 2030 йил 30 июнгача мўлжалланган. Унинг бозор баҳоси 100 млн евро деб кўрсатилмоқда.