Фонсека «Лион» билан трофейлар учун курашга тайёр

«Лион» бош мураббийи Паулу Фонсека жорий мавсумдаги ишларидан ва жамоанинг ўсиб бораётган натижаларидан гапирди. Клуб барча мусобақаларда кетма-кет 13 та ғалаба қайд этиб, бир вақтнинг ўзида уч турнирда ҳам барқарор ўйин намойиш этмоқда. Бу ҳақда euro-football.ru хабар беради.

Фонсека YouTube’даги Olympique-et-Lyonnais каналига берган интервьюсида жамоа совринлар учун етарлича тайёрлигини таъкидлади. Унинг айтишича, бу йўл осон эмас: мураббий учун Лига 1даги тўртинчи мавсум бўлаётган бўлса-да, айнан ҳозирги чемпионат энг рақобатбардош кўринишда кечмоқда. Шунга қарамай, у жамоанинг амбицияси, ишлаш услуби ва футболчиларнинг доимий ривожланиш истагига ишонишини билдирди.

Мутахассис «Лион» бу мавсумда кутилмаган катта сюрприз бўлиши мумкинлигини ҳам қўшимча қилди. У мавсум стартидаги муаммолар ва жамоа бошдан кечирган қийинчиликларни эслатиб, ҳозир клуб имкони қадар энг яхши спорт формасига чиққанини айтди. Фонсека учун асосий мезон — мавсум якуни, ва у охир-оқибат «Лион» алоҳида бир натижа яратишига ишонмоқда.

Ҳозирда «Лион» Франция чемпионатида учинчи ўринда бормоқда. Шунингдек, жамоа Европа Лигаси умумий босқичини биринчи ўринда якунлаб, плей-оффда курашни давом эттиради.