Лаутаро Мартинес тикланиш муддатини билиб олди ва финалга улгура олади
“Интер”нинг сўнгги учрашувида жароҳат олган ҳужумчи Лаутаро Мартинеснинг аҳволи бўйича дастлабки ташхис маълум бўлди. Журналист Эстебан Эдул хабарига кўра, аргентиналик футболчида болдир мушагининг иккинчи даражали чўзилиши аниқланган. Бу ҳақда euro-football.ru хабар беради.
Тахминларга қараганда, Мартинес тахминан 18 кун ичида сафга қайтади. Шу боис у Аргентина терма жамоасининг Испанияга қарши финал учрашувига тайёр бўлиши кутилмоқда.
Жамоалар 27 март куни Finalissima доирасида соврин учун баҳс олиб боради. Унда амалдаги Америка Кубоги ғолиби ва Европа чемпиони тўқнаш келади.
Айни пайтда “Интер” Италия А Сериясида пешқадам. Иккинчи ўриндаги “Милан” етакчидан етти очко ортда бормоқда. “Интер”нинг навбатдаги ўйини 21 февраль куни “Лечче”га қарши бўлиб ўтади.