Игор Колыванов Россия Италия билан ўйин ўтказишига ишонади

Собиқ футболчи Игор Колыванов 2026 йилда Россия терма жамоаси Италияга қарши учрашув ўтказиши мумкинлигига ишонмоқда. Бу ҳақда euro-football.ru хабар беради.

Маълумки, УЕФА ва ФИФА санкциялари сабаб Россия термаси қарийб тўрт йилдан бери фақат ўртоқлик ўйинларини ўтказиш ҳуқуқига эга.

Колывановнинг фикрича, 2026 йилда Россия – Италия баҳсини ташкил этиш эҳтимоли бутунлай йўқ эмас. У бу борада яқинда Франческо Тоттининг Россияга келганини ҳам мисол келтирди. «Италия ҳозир топ-даражадаги жамоа эмас, уларга ҳам ўз савиясини ошириш керак. Россияга қарши ўйин бу жиҳатдан фойдали бўлади», — дея Колывановнинг сўзларини Metaratings келтиради.

Эслатиб ўтамиз, Игор Колыванов футболчилик фаолияти давомида Италияда ҳам ўйнаган: у «Фоджа» ва «Болонья» клубларида тўп сурган.

Россия терма жамоасининг навбатдаги йиғини март ойи охирида бўлиб ўтади. Аввалроқ Валерий Карпин бошқарувидаги жамоа рақибларидан бири Мали терма жамоаси бўлиши мумкинлиги ҳақида хабар берилганди.