Симеоне Лукманнинг ўзига хос жиҳатларини алоҳида таъкидлади

Нигериялик ҳужумчи Адемола Лукман Мадриднинг «Атлетико» клубида илк учрашувлариданоқ ёрқин ўйин кўрсатиб, жамоа мухлислари эътиборини тортди. Унинг стартдаги ишончли чиқишлари бош мураббий Диего Симеонени ҳам тўлиқ қониқтирди. Бу ҳақда euro-football.ru хабар беради.

Аргентиналик мутахассис Лукманни жамоа таркибидаги кўпчилик футболчилардан фарқ қиладиган, индивидуал ҳаракатларга мойил ижрочи сифатида баҳолади. Симеоне фикрича, айнан шу жиҳат рақибларга «Атлетико» ўйинини олдиндан тахмин қилишни қийинлаштиради ва ҳужумга кутилмаган ечимлар қўшади.

«Унинг характеристикалари бошқа ўйинчиларимизникидан ажралиб туради: у кўпроқ якка ҳаракат қиладиган футболчи, бизда эса асосан жамоавий услубдаги ижрочилар бор. Лекин шу орқали рақиб учун кутилмаган бўлишимиз мумкин. Лукман аллақачон жамоа салоҳиятига кучли туртки берди», — дея Симеоне сўзларини келтиради derbyderbyderby.it.

Эслатиб ўтамиз, Лукман бундан аввал бир неча йил давомида Италиянинг «Аталанта» клуби сафида тўп сурган.