Польша армияси сонини 500 минг нафарга етказишни режалаштирмоқда

Польша яқин бир неча йил ичида армия таркибини 500 минг нафар ҳарбийгача кенгайтиришни режалаштирмоқда. Бу ҳақда мамлакат мудофаа вазири Владислав Косиняк-Камиш генераллар билан ўтказилган йиллик йиғилишда маълум қилди, деб TVP Info хабар берди.

Вазирнинг таъкидлашича, ярим миллионлик армия шакллантириш бир неча йилга мўлжалланган стратегик вазифа ҳисобланади. Ушбу мақсад босқичма-босқич амалга оширилади.

Косиняк-Камиш сўзларига кўра, яқин бир йил давомида асосий эътибор жанговар тайёргарликка эга захира кучларини шакллантиришга қаратилади. Шу мақсадда айрим фуқаролик олийгоҳларида ҳарбий кафедралар қайта тикланади ҳамда умумий ҳарбий тайёргарлик дастури жорий этилади.

Ҳозирги вақтда Польша Қуролли кучларида 218 минг нафар аскар ва офицер хизмат қилмоқда. Бу кўрсаткич бўйича мамлакат НАТОда АҚШ ва Туркиядан кейин учинчи ўринни эгаллайди.