«Барселона» Френки де Йонг олти ҳафтагача сафдан чиқди
«Барселона» расмий сайти жамоа ярим ҳимоячиси Френки де Йонг жароҳат олганини маълум қилди. Нидерландиялик футболчи пайшанба кунги машғулотда шикастланган. Бу ҳақда euro-football.ru хабар беради.
Тиббий кўрик натижаларга кўра, 28 ёшли футболчининг ўнг сонининг орқа қисми ташқи томонида шикаст аниқланган.
Клуб хабарида таъкидланишича, де Йонгнинг тикланиш муддати беш-олти ҳафта давом этади. Шу боис у сафга фақат апрел ойининг биринчи ярмида қайтиши кутилмоқда.
Натижада, Френки де Йонг яқин учрашувларни, жумладан Чемпионлар лигаси 1/8 финалидаги иккала ўйинни ҳам ўтказиб юборади.
«Барселона» 28 феврал, шанба куни «Вильярреал»ни қабул қилади.