Тайванда тўрт кун кетма-кет компьютер ўйнаган талаба ҳаётдан кўз юмди

Тайванда яшовчи талаба узлуксиз тўрт кун давомида компьютер ўйинларини ўйнаганидан кейин оғир ҳолатга тушиб, ҳаётдан кўз юмгани хабар қилинди. Маълумотларга кўра, у тўрт кун ва уч кеча давомида деярли танаффуссиз ўйин билан банд бўлган.

Тўртинчи кечада талаба ҳожатга турмоқчи бўлган пайтда қаттиқ оғриқдан қичқириб, ҳушидан кетган. Кейинчалик шифокорлар унинг миясидаги артерия ёрилиб, кучли қон кетиши юз берганини аниқлаган.

Талабанинг онаси сўзларига кўра, у бир неча бор ўғлини компьютерни ўчириб дам олишга ундаган, аммо бу огоҳлантиришлар натижа бермаган.

Ҳодисадан кейин талаба бир неча ой давомида кома ҳолатида бўлган. Кейинчалик оила аъзолари унинг ҳаётини сақлаб турган тиббий ускуналардан воз кечишга қарор қилган.

Мутахассислар эса узоқ вақт танаффуссиз компьютер ўйинлари билан шуғулланиш саломатлик учун жиддий хавф туғдириши мумкинлигини таъкидлаб келмоқда.