Эроннинг янги тактикаси АҚШ мудофаа тизимини кўр қилди

Яқин Шарқдаги вазият кескинлашган бир паллада Эрон томонидан амалга оширилган ракета ҳужуми АҚШнинг минтақадаги ҳарбий инфратузилмасига жиддий зарар етказди. CNN таҳлилларига кўра, Иорданиядаги Муввафақ ас-Салти авиабазасида жойлашган THAAD ҳаво мудофаа тизимининг асосий кўзи ҳисобланган AN/TPY-2 радари бутунлай вайрон бўлган.

Сунъий йўлдошдан олинган тасвирлар қиймати 500 миллион долларга тенг бўлган ушбу қимматбаҳо ускунанинг йўқ қилинганини тасдиқлайди. Мутахассисларнинг фикрича, мазкур радар THAAD мажмуасининг юраги ҳисобланади. Унинг ишдан чиқиши бутун батареяни «кўр» ҳолатга келтириб, баллистик ракеталарни аниқлаш ва уларни тутиб қолиш имкониятини кескин пасайтиради.

Эроннинг бу ҳужуми янги ҳарбий стратегиядан далолат беради. Эндиликда ҳужумлар бевосита ракеталарни эмас, балки уларни бошқарувчи ва кузатувчи сенсор тизимларини нишонга олмоқда. Бу эса АҚШ мудофаа тизимининг самарадорлигини пасайтиришга қаратилган хавфли тактикадир. Ҳозирда АҚШ ихтиёрида атиги 8 та THAAD батареяси мавжудлиги инобатга олинса, вайрон бўлган радарни алмаштириш бошқа ҳудудлардаги хавфсизлик тизимларини қайта тақсимлашни талаб қилади.

Аввалроқ Бирлашган Араб Амирликларидаги THAAD инфратузилмасига ҳам зарбалар берилгани ҳақида хабарлар тарқалган эди. Эроннинг 800 километрдан ортиқ масофадан туриб аниқ зарба бера олгани минтақадаги ҳарбий мувозанатга жиддий таъсир кўрсатиши мумкин.