Гўшт қимматлашди: Қозоғистон сабабини очиқлади
Қозоғистонда гўшт нархи қўшни давлатларга, айниқса Ўзбекистонга фаол экспорт қилинаётгани сабабли юқори даражада сақланиб қолмоқда. Бу ҳақда қишлоқ хўжалиги вазири ўринбосари Ербол Тасжурековга таяниб, “Belles.kz” хабар берди.
Журналистлар вазир ўринбосаридан чорвачиликни ривожлантириш учун давлат дастурларига миллиардлаб маблағ йўналтирилган бўлса-да, нима учун қозоғистонликлар нархлар пасайганини ҳалигача сезмаётганини сўрашган. Ербол Тасжуреков эса мамлакатда гўшт танқислиги йўқлигини, аммо мол гўштининг катта қисми ташқи бозорга чиқарилаётгани учун нархлар юқорилигича қолаётганини айтган.
Унинг таъкидлашича, яқин атрофдаги давлатларга, хусусан, Ўзбекистонга катта ҳажмда экспорт кетмоқда. Сабаби эса Қозоғистон гўшт маҳсулотларига талаб юқори экани билан изоҳланган.
Вазир ўринбосарининг маълум қилишича, Қозоғистонда қарийб 430 минг тонна гўшт ишлаб чиқарилади, ички бозор эҳтиёжи эса 400 минг тоннани ташкил этади. Ортиб қолган маҳсулотлар экспортга йўналтирилади.
Шу билан бирга, яқин уч йил ичида мамлакатда чорвачиликни янада ривожлантиришга туртки берадиган комплекс режа қабул қилиниши ҳам айтилди.