Килиан Мбаппе «Реал Мадрид» машғулотларига қайтди

Чемпионлар лигаси чорак финали доирасида Манчестер Сити билан тўқнаш келадиган Реал Мадрид жамоаси учун муҳим янгиликлар бор. Жамоанинг юлдуз ҳужумчиси Килиан Мбаппе тиззасидаги жароҳатдан сўнг машғулотларга қайтди. Парижда даволаниш курсини ўтаб келган футболчи Валдебебас базасида енгил машқларни бажара бошлади. Бу ҳолат мураббий Алваро Арбелоа учун руҳий жиҳатдан катта ёрдам бўлса-да, футболчининг чоршанба куни бўлиб ўтадиган ўйинда майдонга тушиши ҳали ҳам даргумон. Бу ҳақда goal.com хабар беради.

Клуб тиббий штаби Мбаппенинг соғлиғига жуда эҳтиёткорлик билан ёндашмоқда. Ҳужумчи умумий гуруҳда тўлиқ машғулот ўтказмаяпти, балки фитнес мураббийи назорати остида югуриш машқларини бажармоқда. Реал Мадрид раҳбарияти футболчини таваккал қилиб майдонга туширмоқчи эмас, чунки асосий мақсад уни жавоб ўйини ва ёзги жаҳон чемпионати учун тўлиқ тайёр ҳолатга келтиришдир.

Шу билан бирга, жамоада йўқотишлар ҳам бор. Ҳимоячи Алваро Каррерас ўнг оёғидаги мушак жароҳати сабабли яқинлашиб келаётган муҳим баҳсни ўтказиб юбориши деярли аниқ бўлди. Бироқ, яхши хабарлар ҳам йўқ эмас. Антонио Рйудигер тўлиқ машғулотларга қайтди ва Сити билан ўйинда ҳимоя марказида ҳаракат қилиши кутилмоқда. Шунингдек, Едуардо Камавинга ҳам тишидаги инфекция билан боғлиқ муаммоларни бартараф этиб, асосий таркибга қайтиш учун курашмоқда.

Ҳозирда Реал Мадрид ихтиёрида атиги 17 нафар соғлом футболчи бор. Арбелоа ушбу қийин вазиятда Манчестер Сити каби кучли рақибга қарши қандай тактикани танлаши мухлислар учун катта қизиқиш уйғотмоқда. Жамоа тиббий ходимлари Мбаппенинг ҳолатини ҳар соатда назорат қилиб бормоқда.