Эксперт Абдуқодир Ҳусановнинг «Сити» клубидаги келажагини баҳолади
Англия футболи ва бозор қийматлари бўйича нуфузли эксперт Бенжамин Литтлмор "Манчестер Cитй" клуби шарафини ҳимоя қилаётган ўзбекистонлик иқтидорли ҳимоячи Абдуқодир Ҳусановнинг жорий мавсумдаги фаолияти ҳамда унинг трансфер қиймати борасида ўз фикрлари билан ўртоқлашди. Мутахассис ёш футболчининг Англия Премер лигасидаги ўсиш динамикасини атрофлича таҳлил қилди.
Мавсумнинг дастлабки қисмида ўйин амалиётига эга бўлишда қийналган Ҳусанов, "Манчестер Cитй" ҳимоя чизиғидаги кутилмаган жароҳатлар туфайли асосий таркибдан жой олиш имкониятига эга бўлди. Хусусан, Гвардиол ва Рубен Диашнинг сафдан чиқиши ҳамда Марк Геҳи жамоага келгунига қадар бўлган даврда ўзбекистонлик футболчи кетма-кет бешта учрашувни бошланғич таркибда ўтказди. Бу давр унинг учун катта тажриба мактаби вазифасини ўтаб берди.
Бироқ, таркибдаги рақобатнинг кучайиши ва асосий ҳимоячиларнинг сафга қайтиши Ҳусановнинг яна заҳира ўриндиғига ўтишига сабаб бўлди. Бенжамин Литтлмор таъкидлашича, Абдуқодирнинг ўйинида ижобий силжишлар кўзга ташланаётган бўлса-да, "Манчестер Cитй" каби топ-клубда барқарор ўйнаш учун унга ҳали тажриба ва жисмоний ҳамда тактик етуклик етишмайди. Экспертнинг фикрича, футболчи ҳозирги трансфер қийматини сақлаб қолишга муваффақ бўлган, аммо нархининг янада ошиши учун у ўз ўйинидаги беқарорликни йўқотиб, янада юқори даражадаги барқарорликни намойиш этиши талаб этилади.