Сурхондарёда ўқитувчи йирик наркосавдо пайтида ушланди
Сурхондарё вилоятининг Сариосиё туманида ўтказилган тезкор тадбирда мактаб ўқитувчиси сифатида фаолият юритиб келган шахс йирик миқдордаги наркотик моддани сотаётган пайтда қўлга олинди. Бу ҳақда Давлат хавфсизлик хизмати матбуот хизмати маълум қилди.
Билдирилишича, 1984 йилда туғилган фуқаро умумий ўрта таълим мактабларидан бирида ишлаган. У аввал Тожикистондан наркокурерлар орқали олиб кирилган 14 килограмм 680 грамм опий моддасини шартли харидорга 180 минг АҚШ долларига сотаётган вақтида ашёвий далиллар билан ушланган.
Мазкур ҳолат юзасидан унга нисбатан Жиноят кодексининг 273 моддаси 5 қисми билан жиноят иши қўзғатилган. Тергов даврида унга нисбатан қамоқ эҳтиёт чораси қўлланган.
Айни пайтда ушбу ноқонуний савдога алоқадор бўлган бошқа шахсларни аниқлаш бўйича тезкор-суриштирув ишлари давом эттирилмоқда. ҳуқуқни муҳофаза қилувчи идоралар жиноий тармоқнинг бошқа иштирокчиларини ҳам аниқлаш чораларини кўрмоқда.