Nebius ва Meta сунъий интеллект учун йирик шартнома тузди
Собиқ «Яндекс» бош директори Аркадий Волож томонидан асос солинган ва сунъий интеллект технологиялари учун булутли ҳисоблаш ечимларига ихтисослашган Нидерландиянинг Nebius Group N.V. компанияси Американинг Meta Platforms Inc. билан сунъий интеллект лойиҳалари учун инфратузилма етказиб бериш бўйича узоқ муддатли ва стратегик келишув имзолади. Бу ҳақда Nebius Group N.V.нинг 16 март, душанба куни эълон қилинган пресс-релизида маълум қилинди.
Келишув беш йилга мўлжалланган бўлиб, ушбу даврда Nebius Group N.V. NVIDIA Vera Rubin платформаси асосида қиймати 12 миллиард долларлик ажратилган ҳисоблаш қувватларини тақдим этади. Илк етказиб беришлар 2027 йил бошида амалга оширилиши режалаштирилган.
Шунингдек, Meta Platforms Inc. беш йиллик муддат мобайнида Nebius Group N.V.нинг янги кластерлардаги келажакдаги ҳисоблаш қувватларининг бир қисмини умумий қиймати 15 миллиард долларгача харид қилиш мажбуриятини олди. Қолган қувватлар компания томонидан учинчи томон мижозларига сотилиши ёки захирада сақланиши режалаштирилган.
Битимнинг умумий қиймати тахминан 27 миллиард долларга тенг бўлиб, Bloomberg агентлиги таъкидлашича, бу Meta Platforms Inc. учун ҳисоблаш қувватлари бўйича энг йирик шартномалардан бири ҳисобланади.
«Биз Meta билан қувватлар тақдим этиш бўйича янги йирик узоқ муддатли стратегик ҳамкорлигимизни кенгайтирганимиздан мамнунмиз», — деди Аркадий Волож.
Бу янгилик фонида Nebius Group N.V. акциялари душанба куни савдолар олдидан 15 фоизга қимматлади. Компания акцияларининг қиймати сўнгги 12 ой ичида қарийб тўрт баробар ўсди. Meta Platforms Inc. акциялари эса 2,8 фоизга кўтарилди.
Шунингдек, 2025 йил кузида Nebius Group N.V. Microsoft корпорацияси билан қарийб 20 миллиард долларлик беш йиллик шартнома имзолаган, 2026 йил март ойида эса Nvidia билан 2 миллиард долларлик ҳамкорлик келишувини тузган эди.
Бу ҳамкорлик сунъий интеллект соҳасидаги инфратузилма ва ҳисоблаш қувватлари бўйича глобал бозордаги энг йирик ва стратегик қадамлардан бири сифатида баҳоланмоқда.