Ўзбекистон бўйлаб илиқ об-ҳаво давом этади

Синоптиклар маълумотига кўра, 21 март куни Ўзбекистоннинг аксарият ҳудудларида қуруқ об-ҳаво кузатилади. Фақат куннинг иккинчи ярмида Қашқадарё ва Сурхондарё вилоятларининг айрим жойларида ёмғир ёғиши мумкин. Мамлакат бўйлаб кундузги ҳарорат 20-25 даражагача кўтарилиши прогноз қилинмоқда.

23 ва 24 март кунлари Қорақалпоғистон ва Хоразм вилоятидан ташқари республиканинг айрим ҳудудларида қисқа муддатли ёмғир ёғиши мумкин. Баъзи жойларда момақалдироқ ҳам кузатилиши эҳтимоли бор. Кундузги ҳарорат 20-25 даража атрофида сақланиб қолади, айрим ҳудудларда эса ҳаво 28 даражагача исиши мумкин.

Тунги ҳарорат нисбатан илиқ бўлиб, асосан 7-12 даража оралиғида сақланиши кутилмоқда. Тоғолди ва тоғли ҳудудларда бу даврда сел ва тошқин юзага келиши хавфи борлиги ҳақида синоптиклар огоҳлантирди.

Тошкентда 21 март куни ёғингарчилик кутилмайди, ҳарорат эса 21-23 даражагача етади. 23 ва 24 март кунлари пойтахтда қисқа муддатли ёмғир ва момақалдироқ бўлиши мумкин, кундузги ҳарорат эса 20-25 даража атрофида сақланиб қолади.