Трампнинг эълонидан аввал нефть фьючерслари шубҳали ҳажмда савдоланди

Нефть бозорида сўнгги кунларда муҳим воқеа кузатилди. Financial Times нашри хабар беришича, АҚШ президенти Доналд Трамп Эрон билан «самарали музокаралар» ҳақида постини эълон қилишидан 15 дақиқа олдин нефть трейдерлари бир неча юз миллион долларлик шубҳали фьючерс битимларини амалга оширган. Бу ҳаракат нархларда кескин ўзгаришларга сабаб бўлган.

Трампнинг пости Вашингтон вақти билан соат 07:04 да пайдо бўлган, бироқ соат 6:49 ва 6:50 оралиғида Нью-Йорк биржасида Brent ва WTI нефти савдоси бўйича умумий қиймати қарийб 580 миллион долларга тенг бўлган 6200 дан ортиқ битимлар тузилгани маълум қилинган. Президентнинг эълонидан кейин нефт нархи кескин тушиб, фонд индекслари кўтарила бошлаган.

Бироқ Эрон томони музокаралар олиб борилмаётганини маълум қилганидан сўнг, биржа кўрсаткичлари пасайиб, нефт фьючерслари нархи қайтадан кўтарилган. Бу ҳолат биржанинг тезкор реакцияси ва глобал савдодаги ҳассосликни яққол кўрсатган.

Аналитиклар бу фьючерс битимларининг мувофиқлаштирилган ёки йўқлигини аниқлаш қийин эканини таъкидламоқда. Биржа таҳлилчиларидан бири эса: «Танланган вақт саволлар туғдиради. Кимдир анча бойиб олди», — деган изоҳ берган.

Оқ уй эса инсайдерлик маълумотлари асосида ноқонуний фойда олиниши ҳақидаги гумонларни рад этиб, маъмуриятнинг мақсади – Америка халқи учун энг яхшисини таъминлаш эканини таъкидлади. Куш Десаи, Оқ уй матбуот котиби ўринбосари, «Маъмурият бирор амалдорнинг инсайдер маълумотидан ноқонуний равишда фойдаланишига йўл қўймайди ва бундай фаолият ҳақидаги ҳар қандай ишоралар асоссиздир», — деб қўшимча қилган.

Бу ҳолат нафақат АҚШ нефть бозоридаги ноаниқликни, балки глобал энергетика савдосидаги тезкор ва ҳассос қарорларнинг аҳамиятини яна бир бор кўрсатди.