Тошкентда пойга уюштирган ёшлар 10 суткалик қамоққа маҳкум қилинди

Тошкент шаҳрида пойга ташкил қилган икки йигит 10 суткалик маъмурий қамоққа маҳкум қилинди. Бу ҳақда Ички ишлар вазирлиги Йўл ҳаракати хавфсизлиги бошқармаси расман маълум қилди.

Ҳодиса Олмазор туманидаги йўл қатнов қисмида содир бўлган. Ёшлар пойга уюштириб, йўл ҳаракати қоидаларини бузгани билан бирга, атрофдагилар ҳаётини ҳам хавф остига қўйган.

22-март куни соат 03:40 да Lacetti ва Оnix автомобилларида пойга уюштирилгани, шу билан бирга жамоат тартиби бузилгани ҳақида тезкор хабар келган.

Кўчадаги камера ёзувлари ва гувоҳларнинг кўрсатмалари асосида текширув ўтказилди. Натижада Lacetti автомобилини бошқарган 27 ёшли Рамиз Исломов ва Оnix'даги 21 ёшли Азимжон Абдусатторов аниқланди.

Шу куннинг ўзида машиналар жарима майдонига олиб кетилди ва ҳужжатлар судга тақдим қилинди.Жиноят ишлари бўйича Олмазор тумани суди қарор қилди: ҳар икки йигитга 10 суткалик маъмурий қамоқ жазоси тайинлансин.