Италия бош вазири Мелони Форс кўрфазида муҳим музокара ўтказди

Италия бош вазири Джорджия Мелони яқинда Яқин Шарқдаги кескин геосиёсий вазият фонида Форс кўрфази давлатларига расмий ташриф амалга оширди. Унинг сафарлари қаторига Саудия Арабистони, Қатар ва Бирлашган Араб Амирликлари киради. Шу билан Мелони Европа Иттифоқи ва НАТО мамлакатлари орасида минтақада бўлган илк етакчи лидерлардан бирига айланди.

Ташриф даври АҚШ ва Исроилнинг Эронга қарши ҳарбий ҳаракатлари давом этаётган, ҳамда минтақада ракета ҳужумлари кузатилаётган бир пайтга тўғри келди. Бу сафарнинг режаси хавфсизлик сабабли охирига қадар махфий сақланган эди. Италия оммавий ахборот воситалари хабар беришича, мамлакатнинг махсус хизматлари бош вазирни бундай хавфли сафардан қайтаришга ҳаракат қилган.

Шунга қарамасдан, Мелони Саудия Арабистонида шаҳзода Мухаммад бин Салмон ва Қатарда амир Тамим бин Ҳамад Ол Таний билан учрашувлар ўтказди. Қувайтга ташриф хавфсизлик сабаб бекор қилинган.

Расмий маълумотларга кўра, Мелонининг асосий мақсади Форс кўрфази давлатлари билан сиёсий ва иқтисодий алоқаларни мустаҳкамлаш ҳамда стратегик ҳамкорликни кенгайтириш эди. Таҳлилчилар эса бу ташрифда асосий омил сифатида глобал энергетика хавфсизлигини кўрсатмоқда. Форс кўрфази нефть ва газ захиралари бўйича муҳим марказ бўлиб, дунё нархларига сезиларли таъсир қилади.

Шунингдек, учрашувлар давомида Мелони ва Қатар амири Ҳўрмуз бўғозини қайта очиш ва минтақадаги энергетика объектларини Эрон ҳужумларидан тиклаш масалаларини муҳокама қилди. Мелони Қатарга ушбу жараёнда ёрдам беришга ваъда берди.

Бу сафар Европа ва Жанубий Ғарб сиёсати учун ҳам, глобал энергетика барқарорлиги учун ҳам муҳим аҳамиятга эга бўлгани айтилади.