Қайнонасини ўлдириб, жасадни дарёга ташлаган куёв қўлга олинди

Жанубий Кореянинг Дэгу шаҳрида шов-шувли ва даҳшатли жиноят содир бўлди — куёв қайнонасини ўлдириб, хотини билан бирга жасадни чамадонга солиб дарёга ташлади. Бу ҳақда РЕН ТВ хабар берди.

Маълумотларга кўра, 50 ёшли аёл қизи ва куёви билан яшаш мақсадида уларнинг уйига кўчиб келган. 20 ёшли куёв эса қайнонасини ёқтирмай, бир неча ой давомида уни мунтазам равишда калтаклаб келган.

Сўнгги воқеада, аёлнинг шовқинли ва тартибсиз хулқини баҳона қилиб, куёв уни икки соатдан зиёд уриб, тепиб қийнаган ва натижада аёл кўплаб жароҳатлар олган ҳолда вафот этган.

Бунинг ортидан эркак жасадни чамадонга жойлаб, кўча бўйлаб судраб борган ва дарёга улоқтирган. Жиноят вақтида унинг хотини ҳам ёнида бўлган.

Жасад топилгандан сўнг, полиция терговни бошлаган ва эр-хотин қўлга олинган. Эркак ўз жиноятини тан олган.