Инсоният ярим асрдан сўнг яна Ойга йўл олди

НАСА 2 апрель куни тўрт нафар астронавтни Ой атрофидаги 10 кунлик парвозга тайёрламоқда. Бу АҚШнинг сўнгги ўн йилликлардаги энг катта космик миссияси бўлиб, Хитой ўз экипажини қўндиришидан олдин инсониятни Ер қўшнисига олиб чиқишда муҳим қадам саналади.

Миссияда SLS ракетаси ва ундаги Орион капсуласи чоршанба куни маҳаллий вақт билан 18:24 да (Тошкент вақти билан 03:24) стартга тайёр эканлиги тасдиқланди. Ракета Флоридадаги Кеннеди космик марказидан — ярим аср олдинги Apollon миссияси майдончасидан парвоз қилади.

Экипаж: НАСА астронавтлари Кристина Кох, Виктор Гловер, Рид Уайзмен ва канадалик Жереми Хансен. Улар 27 мартда Хюстондан Флоридага етиб келиб, парвоздан олдин икки ҳафталик карантиндан ўтди.

Парвоз давомида астронавтлар ҳаётни таъминлаш тизимлари ва алоқа интерфейсини синовдан ўтказади, Орион кемасини қўлда бошқариш машқлари ҳам бўлади. Artemis II экипажни Ой орбитасига олиб чиқиб, 406 000 километр масофага олиб боради – бу инсон тарихидаги энг узоқ парвоз бўлади.

SLS ракетасини Boeing ва Northrop Grumman, Орион капсуласини Lockheed Martin яратган. Ҳар бир парвоз 2–4 миллиард долларга тушса-да, у АҚШнинг космосдаги устуворлигини таъминлашга қаратилган.

НАСА бу дастур орқали Ойнинг жанубий қутбида узоқ муддатли базани шакллантиришни мақсад қилган ва 2028 йилгача Artemis IV миссиясида илк экипажни қўндиришни режалаштирмоқда. Шу билан бирга, SpaceX ва Blue Origin ҳам ушбу парвоз учун технологияларини ривожлантирмоқда.