Эйфел минорасининг зинапояси кимошдига чиқмоқда

Франция пойтахти — Париждаги машҳур Эйфел минораси билан боғлиқ яна бир қизиқарли янгилик эълон қилинди. Афсонавий иншоотнинг асл зинапоясига тегишли бўлган ноёб парча яқин кунларда кимошди савдосига қўйилиши режалаштирилмоқда. Бу ҳақида The New York Times” хабар берди.

Маълумотларга кўра, сотувга чиқарилаётган ушбу фрагмент аввал меҳмонларга миноранинг иккинчи қаватидан учинчи қаватига кўтарилиш имконини берган айланма зинапоянинг бир қисми бўлган. Тарихий манбаларда қайд этилишича, 1983 йилда мазкур конструкция демонтаж қилиниб, жами 24 бўлакка ажратилган. Шулардан 20 таси аллақачон турли аукционлар орқали ўз эгаларини топган.

Эндиликда эса сотувга қўйилаётган ушбу қисм қолган энг сўнгги фрагмент сифатида алоҳида эътибор қозонмоқда. Илгари, хусусан 2016 йилда зинапоянинг шунга ўхшаш бўлаги рекорд даражада — 611 минг долларга сотилгани ҳам бу лотга бўлган қизиқишни янада оширади.

Аукционни ташкил этаётган Artcurial савдо уйи бу сафар ҳам янги рекорд ўрнатилишига умид қилмоқда. Мутахассислар баҳосига кўра, лотнинг бошланғич нархи 146 мингдан 176 минг долларгача бўлиши мумкин.

Қайд этиш жоиз, ушбу тарихий буюм ҳозирга қадар 1983 йилда уни сотиб олган франциялик тадбиркор мулкида сақланиб келган.

Эслатиб ўтамиз, Эйфел минораси 1889 йилда ўтказилган Бутунжаҳон кўргазмаси учун муҳандис Гюстав Эйфел томонидан лойиҳалаштирилиб, қисқа фурсатда дунёнинг энг таниқли рамзларидан бирига айланган. Бугунги кунда ҳам у нафақат Франциянинг, балки бутун дунёнинг энг машҳур диққатга сазовор масканларидан бири ҳисобланади.